Cundiziuns generalas da fatschenta Helvetiarockt 

1. Disposiziuns introductivas
   Questas cundiziuns generalas da fatschenta valan per tut las annunzias per curs da Helvetiarockt. Tut tuttina sch’ellas èn vegnidas fatgas sur la pagina d’internet helvetiarockt.ch, per e-mail u sin autra moda. L’uniun Helvetiarockt è contrahenta (sequent Helvetiarockt).
   En cas da participaziuns da curs tras persunas minorennas èn lur represchentants e represchentantas legals responsabels che questa AGB vegnia resguardada.
   
2. Organisaziun dal curs
   Per motivs organisatorics sa resalva Helvetiarockt da fusiunar curs u da spustar quels per temp/local; las participantas ed ils participants survegnan en quest connex la pussaivladad d’avisar ils curs colliads/spustads. Sch’ina manadra u manader dals curs croda ora, po Helvetiarockt far ina midada da las manadras e dals manaders da curs u engaschar ina substituziun.
   En cas d’in dumber memia pitschen da participantas e da participants sa resalva Helvetiarockt da betg manar tras il curs e da restituir ils daners dal curs. Pretensiuns supplementaras da las participantas e dals participants, en spezial pretensiuns d’indemnisaziun en cas da midadas u da l’annullaziun d’in curs, èn exclusas explicitamain.
   Helvetiarockt po excluder participants d’in curs per motivs impurtants (p. ex. donn intenziunà da material, mulesta, offensa). Participants exclus n’han nagin dretg da restituziun dals daners da curs; in’eventuala restituziun fa Helvetiarockt tenor agen giudicament.
   
3. Annunzias e perstgisas dal curs
   Mintga annunzia dal curs è lianta ed oblighescha las participantas ed ils participants da pajar ils daners dal curs. Helvetiarockt resalva il dretg da refusar annunzias. Suenter l’annunzia per in curs survegn la participanta ina conferma d’annunzia cun instrucziuns da pajament liantas da Helvetiarockt. Questa conferma d’annunzia sto vegnir examinada immediatamain ed eventuals sbagls ston vegnir annunziads immediatamain a Helvetiarockt.
   L’annunzia per il curs po vegnir fatga per telefon u per e-mail. Betg pajar ils daners dal curs na vala betg sco perstgisa. En cas che la perstgisa vegn fatga fin almain 7 dis da chalender avant il cumenzament dal curs, relascha resp. restituescha Helvetiarockt ils daners dal curs. Quai cun ina taxa d’elavuraziun da CHF 20. En cas che la perstgisa succeda pli tard vegnan tut ils daners dal curs debitads.
   
4. Pajament
   Cun la conferma d’annunzia survegnan ils participants in quint per ils daners da curs. Ils daners per il curs ston esser arrivads fin il pli tard in’emna avant l’entschatta dal curs tar Helvetiarockt. Il betg pajar ils daners per il curs na vala betg sco perstgisa, quai vul dir ch’ils daners per il curs restan anc adina debitads a Helvetiarockt e pon vegnir pretendids da Helvetiarockt sch’i n’è betg avant maun ina perstgisa valaivla.
   
5. Exclusiun da la responsabladad e da l’assicuranza
   Helvetiarockt e la direcziun dal curs excludan tutta responsabladad. L’assicuranza è chaussa dals participants resp. da lur represchentants legals. Il diever da las localitads da Helvetiarockt succeda sin atgna ristga. Helvetiarockt n’è betg responsabel per accidents, enguladitschs, sperdita d’objects u donns da tuttas sorts che capitan tant durant sco er ordaifer il curs.
   
6. Protecziun da datas
   L’elavuraziun da datas persunalas en connex cun la participaziun al curs succeda tenor nossa decleraziun da protecziun da datas, en quest connex pon ins consultar [link]. Cun l’annunzia acceptan las participantas ed ils participants dal curs l’elavuraziun da datas per la participaziun al curs, descritta tenor nossa decleraziun da protecziun da datas.
   
7. Dretgs d’utilisaziun da videos e maletgs
   Helvetiaract po far durant ils curs registraziuns da video e maletgs da las activitads dals curs e da las participantas e dals participants e publitgar quellas per intents d’infurmaziun e da reclama (p.ex. sin paginas d’internet, chanals da social media u en broschuras, flyers, communicaziuns a las medias euv.)
   Las participantas ed ils participants ch’èn d’accord cun l’annunzia dal curs e da vegnir illustrads/ registrads en video e maletg surdattan a Helvetiarockt tut ils dretgs pussaivels per l’utilisaziun da questas registraziuns tras Helvetiarockt tenor questas cundiziuns generalas da fatschenta.
   
8. Midadas
   Helvetiarockt po midar da tut temp questas cundiziuns generalas da fatschenta. I vala mintgamai la versiun ch’è vegnida publitgada il mument da l’annunzia dal curs sin questa pagina d’internet.
   
9. Clausula salvatorica
   Sche singulas disposiziuns da questas cundiziuns generalas da fatschenta n’èn betg effizientas u incumplettas u sch’i è nunpussaivel d’ademplir ellas, na vegn la efficacitad da las ulteriuras parts qua tras betg reducida. La clausula inefficazia u incumpletta è da remplazzar tras ina disposiziun effectiva che correspunda a l’intent dal contract e che vegn admessa.
   
10. Dretg applitgabel e dretgira giudiziala
    Per tut las relaziuns giuridicas cun Helvetiarockt è il dretg svizzer applitgabel, senza pussaivladad da far diever dal dretg internaziunal da la collisiun. In tribunal exclusiv per tut las cuntraversas en connex cun questas cundiziuns generalas da fatschenta è Berna, Svizra.